चैत ७ – एसएलसी परीक्षाको तयारीका लागि चितवनको नेपाल आदर्श वोर्डिङ स्कुलको होस्टेलमा बसेर अध्ययन गरिरहेका १६ वर्षीय गौरब बस्नेतको होस्टेलमा मृत्यु भएको घटना रहस्यमय भएको भन्दै उनको परिवारले यसबारे प्रहरी प्रशासनले गम्भीरतापूर्वक चासो नलिएको आरोप लगाएका छन् । आत्महत्या गरेको भनेर विद्यालयले गरेको दाबीलाई साथ दिएर प्रहरी प्रशासनले पनि घटनाको सत्यतथ्य बाहिर ल्याउन अरुचि देखाएको भन्दै परिवारले यसबारे सत्यतथ्य छानविन गर्न माग गरेका छन् ।

 गत चैत १ गते कठार–५,चितवनको नेपाल आदर्श बोर्डिङ स्कुलमा एसएलसी तयारीका लागि होस्टेलमै बसेर तयारी गरिरहेका गौरबले झुन्डिएर आत्महत्या गरेको विद्यालयले जनाएको थियो ।

तर,परिवारले घटनाको प्रकृति र विद्यालयको व्यवहारले घटना आत्महत्या नभएर हत्या भएको आशंका उब्जाएको भन्दै यसबारे छानविन हुनुपर्ने माग गर्दै आइरहेको छ । मृतक गौरब बस्नेतका मामा कृष्णप्रसाद अर्यालले विद्यालयले आत्महत्या गरेको भनेर गरेको दाबीमा शंका गर्ने पर्याप्त आधार हुँदाहुँदै पनि प्रहरीले विद्यालयसँग मिलेर घटनाको छानविनमा चासो नदेखाएको आरोप लगाए । उनले कसैलाई जानकारी नदिई अस्पताल लग्नु र अस्पतालले मृत्यु भएको बताएपछि शव घरमा लगेर मात्र परिवारलाई खबर गर्नुले घटना आत्महत्या नभएर हत्या भएको हुनसक्ने आशंका उब्जिएको बताए ।

‘झुन्डिएर मरेको भनिएको व्यक्तिलाई प्रहरी र परिवारलाई समेत थाहा नदिई अस्पताल लगियो,’ अर्यालले रातोपाटीसँग भने,‘अस्पताल लग्दासमेत परिवारलाई थाहै नदिइ शव घरमा लगेपछि मात्रै बिरामी भएको भन्दै अस्पताल बोलाइयो । विद्यालयले अस्पताल लग्नु अघि नै परिवारलाई खबर नगरेर किन अस्पतालबाट शव घरमा लगेपछि मात्रै खबर गर्यो ? यसले आत्महत्या भन्ने विद्यालयको दाबीमाथि गम्भीर आशंका उब्जाएको छ ।’

 परिवारले गौरबले आत्महत्या गर्ने कुनै कारण नै नभएको दाबी गर्दै विद्यालयले गन्जीमा पासो लगाएर आत्महत्या गरेको भनेर लगाएको दाबीमा कुनै सत्यता नभएको बताएको छ ।

गौरबको शरीरमा देखिएको नील डाम,कोठामा भेटिएको रगत र शरीरका विभिन्न भागमा कोपिएको पाइनुले पनि घटना आत्महत्या नभएर हत्या नै भएको परिवारको दाबी छ । ‘आत्महत्या गरिएको भनिएको मृतकको शरीरमा रगत र कोठामा रगत लत्पतिएको भेटिएको छ । शरीरमा कोपिएको र काटिएको समेत पाइएको छ । आत्महत्या गरेको भनिएको व्यक्तिको शरीरमा र कोठामा कसरी रगतको आहाल भेटियो ?’ गौरबका मामा कृष्णप्रसाद अर्यालले विद्यालयको दाबीप्रति आपत्ति जनाउँदै भने ।

मृतक गौरबका परिवारले आत्महत्या नभएर हत्या भएको भन्दै विद्यालयका प्रधानाध्यापक विन्दु पौडेल र वार्डेन सन्तोष पौडलमाथि किटानी जाहेरी समेत दिएको छ । उता,प्रहरीले भने घटनालाई गम्भीरतापूर्वक लिएर यसबारे अनुसन्धान भइरहेको बताएको छ ।

घटनाबारे अनुसन्धान गरिरहेका डिएसपी राजन अधिकारीले घटनालाई गम्भीर रुपमा लिएर प्रहरीले अनुसन्धान गरिरहेको बताए । उनले घटनाको गाम्भीर्यतालाई बुझेर विशेषज्ञ चिकित्सकहरुको मेडिकल बोर्डबाटै पोष्ट मार्टम गराइएको जानकारी दिँदै पोस्टमार्टम रिपोर्ट आएपछि मात्रै यसबारे थाहा हुने बताए । ‘प्रहरी प्रशासनले यो घटनालाई गम्भीरतापूर्वक लिएर अनुसन्धान गरिरहेको छ,’ डिएसपी अधिकारीले रातोपाटीसँग भने,‘पोस्टमार्टम रिपोर्टपछि मात्रै यसबारे थप प्रष्ट हुन्छ । त्यसैले यसबारे अहिले धेरै बोल्नु उपयुक्त हुँदैन ।