राम्रो नतिजाका लागि गहन अध्ययन नै प्रमुख उपाय हो । सांस्कृतिक विविधताका कारण विभिन्न देशमा धेरै चलन प्रचलित छन् । बिबिसीका अनुसार मध्यपूर्वी एसियामा विद्यार्थीले परीक्षामा राम्रो गर्नका लागि अपनाउने केही उपाय यस्ता छन् । 

१) जापानमा किटक्याट : जापानका विद्यार्थीले परीक्षाको अघिल्लो र परीक्षाको दिन काटसुडन नाम गरेको खाना खान्छन् । एक कचौरा तातो भात, अण्डा र सुङगुरको मासु मिलाइएर बनाइएको काटसुडन खाएमा परीक्षा राम्रो हुने विश्वास छ । यस्तै जापानका विद्यार्थीमा राम्रो परीक्षाका लागि किटक्याट चकलेट आपसमा बाँड्ने चलन पनि छ । किट्टो काट्टो नाम गरेको चकलेट खाएमा परीक्षा पूर्ण सफल हुने विश्वास गरिन्छ । 

२) दिनको एउटा स्याउ : हङकङमा स्याउ खाएमा परीक्षा राम्रो हुने विश्वास छ । हङकङका विश्वविद्यालय तथा क्याम्पसका क्यान्टिनमा स्याउका विभिन्न परिकार पाइन्छ । चिनियाँ भाषामा स्याउलाई पिङ गुओ भनिने र त्यसको अर्थ सुरक्षा हुने भएकाले दिनको एउटा स्याउ खाएमा परीक्षा निश्चित पास हुने विश्वास गरिन्छ । 

३) कपाल नधुने : दक्षिण कोरियामा परीक्षा अघि टाउको नुहाउन नहुने धारणा छ । टाउको नुहाएर परीक्षा दिन गएमा दिमागमा भएको सबै कुरा जान्छ भन्ने धारणा छ । 

४) परीक्षाका लागि पागलपन : हङकङमा परीक्षा सुरु हुनुभन्दा एक महिना अघिदेखि विद्यार्थी स्थानीय क्लब, सामुदायिक तथा आवसीय भवनमा जम्मा भएर सुपरपास भन्ने अभियान गर्छन् । 

यस अन्तर्गत विभिन्न क्रियाकलाप हुन्छ, जसले परीक्षा पास गर्न सहयोग गर्ने विश्वास गरिन्छ । यसमा चिनियाँ रेस्टुरेन्टमा सुपरपास डिनर गर्ने चलन छ । यो डिनरमा काजुको साथमा सुङगुरको मासु खाने गन्छि । सुङगुरको मासु क्युब आकारको हुन्छ । काजुलाई पास हुने शुभकामना तथा सुङगुरको मासुलाई विशिष्ट श्रेणीको कामनाका रुपमा लिइन्छ । 

५) भाग्यको एक टुक्रा : चीनमा परीक्षा दिन जानुअघि बंगुरको रोस्ट बनाइएको मासुलाई टुक्रा गर्ने चलन छ । प्रत्येक परीक्षार्थीलाई एक पटक बंगुरको मासुलाई टुक्रा पार्ने अवसर दिइन्छ । टुक्रा पार्न सफल हुने विद्यार्थी पहिलो पटकमै पास हुने र नसक्नेले अर्को पटक फेरि परीक्षा दिनुपर्छ भन्ने मान्यता छ । 

६) सफलताका लागि प्राथना : पूर्वी एसियाका विभिन्न देशमा परीक्षा दिन जानुअघि भगवानसँग सफलताका लागि प्राथना गर्ने चलन छ । यस्तै अभिभावकले पनि आफ्ना सन्तानको सफलताका लागि प्राथना गर्छन् । 

७) समुद्री लेउको सुप : दक्षिण कोरियामा परीक्षाअघि समुद्री लेउ (सिविड) को सुप (रस) खान हुँदैन भन्ने चलन छ । यस्तो सुप दक्षिण कोरियामा धेरै खाइने गर्छन् । तर परीक्षा अघि यो सुप खाएमा घोकेको सबै बिर्सिन्छ भन्ने विश्वास छ । 

८) कुखुराको मासु : दक्षिण कोरियामा विश्वविद्यालयको प्रवेश परीक्षा अघि कुखुराको मासु खाने चलन छ । यसले स्मरण शक्ति बढाउने विश्वास गरिन्छ । यस्तै मलेसिया, हङकङ तथा दक्षिण कोरियामा परीक्षाअघि र परीक्षाको दिन चिकेन जुस पिएमा परीक्षा राम्रो हुने विश्वास छ । 

९) रातो कट्टु लगाउने : चीनमा रातो रंगलाई शुभ मानिन्छ । चीनमा धेरैले परीक्षाका बेला रातो रंगको लुगा लगाउनु त्यसमा पनि भित्री कट्टु रातो लगाउनु निकै शुभ हुने विश्वास गर्छन । चीनमा कुनै पनि सफल व्यक्तिलाई तपाईंले परीक्षाका बेला रातो कट्टु लगाउनु भएको थियो ? भनेर सोध्ने चलन पनि छ ।