प्राधिकरणले खाना पकाउने बिहान र बेलुकाको समयमा सकभर लोडसेडिङ नगर्ने बताएको थियो । तर नयाँ तालिकामा एक दिन त खाना पकाउने समय बिहान चारघण्टा र बेलुका पाँचघण्टा लोडसेडिङ हुने उल्लेख छ । अरु दिन पनि अपायक समयमा बत्ति आउने तालिका छ ।

सातवटै समूहमा हप्ताको एकदिन बिहान ६ बजेदेखि १० बजेसम्म र बेलुका ४ बजेदेखि ९ बजेसम्म लोडसेडिङ हुने प्राधिकरणको तालिकामा छ । यो दिन भात खान बिहान कि ६ बजे अघि नै पकाइसक्नुपर्छ कि १० बजेपछि थाल्नुपर्छ । अनि बेलुका कि ४ बजे अघि नै पकाइसक्नुपर्छ कि राती ९ बजेपछि भान्सामा पस्नुपर्छ । पढ्ने र जागिर खानेलाई मात्र होइन, घरमै बस्नेलाई पनि यो दुवै समय अपायक हुन्छ । त्यसैले हप्ताको एक दिन कि दाउरामा भात पकाउनुपर्यो । नत्र भोकै बस्नुपर्ने हुन्छ ।

नयाँ तालिका अनुसार समूह १ का शहरिया उपभोक्ताले सोमबार बिहान र बेलुका बिजुलीमा भात पकाउन पाउँदैनन् । यसैगरी समूह २ मा मंगलबार, समूह ३ मा बुधबार, समूह ४ मा बिहीबार, समूह ५ मा शुक्रबार, समूह ६ मा शनिबार र समूह ७ मा बिहान ६ बजेदेखि १० बजेसम्म र बेलुकी ४ बजेदेखि ९ बजेसम्म बत्ति हुँदैन ।

काठमाडौं सहित शहरका धेरै घरमा प्रायः बिहान ७ बजेदेखि ९/१० बजेसम्म भात पकाउने चलन छ । निजी स्कुल १० बजेअघि नै खुल्ने र जागिरेहरु पनि समयमै कार्यालयमा पुग्नुपर्ने भएकाले बिहान ६ बजेदेखि ८ बजेसम्म धेरैको भान्सामा भात पकाउने सुरसार हुन्छ । घरमै बस्नेले ९÷१० बजेसम्म पकाइसक्छन् ।

तर इन्डक्सन र हिटरबाट भात पकाउनेहरुले बिहानको यो समयमा आफुले चाहे अनुसार भान्साको काम गर्न पाउँदैनन् । हप्ताको दुई दिन त बिहान ८ बजेपछि मात्र बिजुली आउँछ । अनि अरु दिन ८ बजेपछि बिजुली गैहाल्छ । ८ बजे गएको बिजुली दिउँसो अबेर मात्र आउँछ ।

बेलुका पनि हिजोआज चाँडै रात पर्छ । चिसो पनि बढ्दै गएकाले धेरैजना चाँडै भात पकाएर सुत्ने गर्छन । तर इन्डक्सन र हिटरमा भात पकाउनेले प्रायः बेलुकी ८ बजे मात्र चुल्हो सल्काउन पाउँछन् । दुई÷तीन दिन मात्र ८ बजेअघि बिजुली हुन्छ ।

तालिका अनुसार बत्ति आउँदा पनि शहरका धेरैलाई अब बिजुलीको उपकरणमा भात पकाएर खान मुश्किल हुने भएको छ । त्यसमाथि धेरै भारका कारण लोडसेडिङ नहुने समयमा पनि बिजुली नआएर उपभोक्ता हैरान भैरहेका छन् ।